الشاعرة ايمان بشناق

عش طيبة
---------
ياعنيها يا عش طيبة
غطيني تحت جناحاتك
الفرقة قاسية وصعيبة
طيرك حياته ف حياتك
--------------------

النني سره في بيرك
يسحرني صوته وسكاته
غرقان ف بحرك أسيرك
راهب يقدم صلاته
--------------------
يا رموش ستاير محنة
أنا بس بسأل وماشي
اناقلبي كان جنب منَّا
قال راح وراجع ماجاشي
---------------------
يا جبين كما البدر لالا
زوقلي بالضي ليلي
ونده وقاللي تعالى
أنا قلت منه ياويلي
--------------------
يازهرة يامستحية
ليه تخفي عن عيني عينك
دة انا روحي ف النظرة دية
روحي وعيني لعينك
--------------------
تاج الحيا زانه راسك
أنا شفته دوبلي قلبي
غلاّكِ ومغلّي ناسك
بخت اللي يعرف يربي
--------------------

انتِ ياقوتة ف بحورها
يابخت من غاص معاها
وشوش محارة ف خدورها
وسمع حلاوة غناها
--------------------
ياسمرة لونك دة غِيّة
لُون فرحتي اللي فاتِتْني
وعيونك العايشة فية
من غربتي لملمتني
--------------------

استني يا شمس كونك
لا تبعدي عن سمايا
أنا مين اكون لولا كونك
دة انت طبيبي ودوايا
--------------------

أناجفن عيني شكاني
للي مشي واللي عدى
ياليلي ليه طال هواني
والدمع امتى هيهدى
-------------------
سايق عليك الليالي
وجمالك اللي قتلني
حنّي على وتعالي
العشق عني شغلني
--------------------
سايق عليكي نجومك
اللي في ليلك خدوني
اسهر معاهم الومك
ويلوموا فية جنوني
--------------------
سايق عليك لهيبي
ناري ف بعدك وهمي
عطشان لشوفة حبيبي
لو حتى لحظة ف حلمي